Kryetari i Bashkisë Pogradec, z. Ilir Xhakolli, zhvilloi një vizitë në studion e piktorit të njohur pogradecar, Gentian Zeka, në fshatin Rëmenj. Gjatë kësaj vizite, kryebashkiaku shprehu vlerësimin dhe mirënjohjen për kontributin që Zeka po jep në promovimin e Pogradecit përmes artit të tij.
“Gentian Zeka është një nga ata artistë që me punën dhe pasionin e tij jo vetëm na bën krenarë, por e promovon Pogradecin në dimensione të ndryshme,” u shpreh Xhakolli.
Zeka, i njohur për pjesëmarrjen në dhjetëra ekspozita kombëtare dhe ndërkombëtare, ka zgjedhur të qëndrojë në vendlindjen e tij, duke zhvilluar jetën dhe krijimtarinë artistike pranë natyrës dhe inspirimit që i ofron zona e Rëmenjit dhe më gjerë.
Kryetari Xhakolli njoftoi se Bashkia do të ndërmarrë hapa konkretë për të mbështetur artistët lokalë: “Do të punojmë që së shpejti t’i mundësojmë një studio në qytet Gentit, ndërkohë që në Qendrën e re të Vizitorëve në Drilon do të krijojmë një kënd të veçantë për piktorët, ku do të kenë mundësinë të ekspozojnë dhe të shesin veprat e tyre.”
Ky angazhim është pjesë e vizionit të Bashkisë Pogradec për të nxitur artin dhe kulturën si pjesë të rëndësishme të jetës së përditshme dhe zhvillimit lokal.
