Në ambientet e Fakultetit të Edukimit dhe Filologjisë në Universitetin “Fan S. Noli” të Korçës (UNIKO), u zhvillua sot një aktivitet i veçantë akademik, ku u prezantua puna 5-vjeçare studimore dhe botuese e Qendrës së Studimeve dhe Publikimeve për Arbëreshët (QSPA), e fokusuar në gjuhën, letërsinë, historinë, antropologjinë dhe folklorin arbëresh.
Takimi u hap me përshëndetjen e dekanes së Fakultetit, prof. as. dr. Jonela Spaho, e cila falënderoi organizatorët dhe shprehu gatishmërinë për thellimin e bashkëpunimit me Qendrën përmes projekteve të reja të përbashkëta.
Veprimtaria u organizua nga Departamenti i Gjuhës dhe Letërsisë, ku përgjegjësi i departamentit, prof. as. dr. Eris Rusi, theksoi rëndësinë e bashkëpunimeve institucionale në funksion të promovimit dhe studimit të gjuhës, letërsisë dhe kulturës shqipe.
Në vijim, drejtoresha ekzekutive e QSPA-së, prof. as. dr. Diana Kastrati, prezantoi linjën editoriale të Qendrës dhe aktivitetet kërkimore në fushën e studimeve arbëreshe. Studiueset dr. Dorina Arapi dhe dr. Hysnie Haxhillari prezantuan një pasqyrë të gjerë të 25 botimeve të realizuara gjatë pesë viteve të fundit.
Në përfundim, këto botime iu dhuruan Bibliotekës së Fakultetit të Edukimit dhe Filologjisë, me qëllim që të shërbejnë si burim studimor për studentët dhe stafin akademik në fushën e kërkimeve gjuhësore, letrare dhe kulturore.
Ky aktivitet shënon një hap të rëndësishëm drejt forcimit të lidhjeve ndërinstitucionale dhe mbështetjes së kërkimit shkencor në fushat e albanologjisë dhe trashëgimisë kulturore arbëreshe.
