Pallati i sportit “Tamara Nikolla” në Korçë do t’i nënshtrohet një rikonstruksioni të plotë, si dhe një shtese të re në strukturë. Projekti është miratuar nga Këshilli Bashkiak i Korçës dhe parashikon jo vetëm rehabilitimin e ambienteve ekzistuese, por edhe ndërtimin e një kati shtesë, me qëllim zgjerimin e funksioneve të kësaj hapësire sportive shumë të frekuentuar.
Financimi i këtij projekti do të mbulohet në masën 80% nga Ministria e Arsimit dhe Sportit dhe në 20% nga fondet e Bashkisë së Korçës. Kjo ndërhyrje synon të modernizojë një nga godinat më të rëndësishme sportive të qytetit dhe të krijojë kushte bashkëkohore jo vetëm për sportistët profesionistë, por edhe për të hapur rrugën drejt zhvillimit në Korçë të kompeticioneve të rëndësishme kombëtare dhe ndërkombëtare.
Kryetari i Bashkisë, Sotiraq Filo, e ka konsideruar projektin si një hap konkret për rritjen e angazhimit të të rinjve në sport dhe për përmirësimin e infrastrukturës sportive në Korçë.
