Myftinia e Zonës Korçë ka njoftuar se falja e Namazit të Kurban Bajramit për të gjithë besimtarët myslimanë të qytetit do të zhvillohet ditën e premte, më 6 qershor 2025, në një ceremoni të përbashkët në oborrin e xhamisë historike “Iljas Bej Mirahori”.
Sipas njoftimit, programi i Bajramit do të nisë në orën 06:15 me ligjërata fetare, ndërsa namazi i Kurban Bajramit do të falet në orën 06:45, për të gjitha xhamitë e qytetit.
Organizimi i përbashkët për të dy xhamitë e qytetit synon të forcojë ndjenjën e bashkësisë, solidaritetit dhe paqes mes besimtarëve, në një nga festat më të rëndësishme të kalendarit islamik.
Kurban Bajrami është një ditë e shenjtë që simbolizon sakrificën, devotshmërinë dhe ndarjen me të tjerët. Besimtarët myslimanë pritet të marrin pjesë masivisht në faljen e namazit, por edhe në traditën e therjes së kurbanit dhe shpërndarjes së mishit për nevojtarët.
Myftinia e Korçës u bën thirrje të gjithë besimtarëve që të marrin pjesë në këtë falje të përbashkët dhe të përjetojnë vlerat shpirtërore të kësaj feste në unitet.
