Festa e Kurban Bajramit ka mbledhur sot besimtarët myslimanë në Pogradec në një atmosferë të mbushur me lutje, mirëkuptim dhe solidaritet. Në këtë ditë të shenjtë, Myftiu i Pogradecit, Namik Mahmutllari, priti urimet e qytetarëve në ambientet e Myftinisë, ku u zhvilluan takime të ngrohta me përfaqësues të komuniteteve të tjera fetare, autoritete vendore dhe qindra qytetarë.
Përmes këtyre vizitave dhe përshëndetjeve, u përcollën mesazhe paqeje, bashkëjetese dhe respekti të ndërsjellë. Kurban Bajrami është një kohë reflektimi të thellë shpirtëror, sakrifice dhe përkujdesjeje ndaj atyre që kanë më shumë nevojë.
Festa solli edhe një herë në vëmendje vlerat universale të besimit, faljes dhe dashurisë për Zotin dhe për njëri-tjetrin.
