Nga data 23 deri më 30 qershor 2025, në qytetet e Pogradecit dhe Maliqit do të zhvillohet edicioni i 21-të i Festivalit Ndërkombëtar të Monodramës “ALBAMONO”, një nga ngjarjet më të rëndësishme kulturore të skenës teatrore në Shqipëri.
Ky edicion i radhës sjell në skenë artistë dhe trupa nga 8 shtete të ndryshme: SHBA, Shqipëria, Ukraina, Greqia, Kroacia, Emiratet e Bashkuara Arabe, Maqedonia e Veriut dhe Polonia. Shfaqjet e tyre do të prezantohen para publikut shqiptar, duke sjellë një përvojë ndërkulturore të pasur dhe emocione të veçanta për artdashësit e teatrit.
Një nga risitë e këtij viti është zgjerimi i Festivalit edhe në qytetin e Pogradecit, duke e shtrirë aktivitetin në gjithë Qarkun e Korçës, në funksion të promovimit të turizmit dhe kulturës lokale. Festivali, i cili nisi si një iniciativë e regjisorit dhe aktorit të njohur Dhimitër Orgocka, sot organizohet nga Qendra Kulturore “Dhimitër Orgocka”, me mbështetjen e veçantë të Bashkive Maliq e Pogradec, si dhe Ministrisë së Ekonomisë, Kulturës dhe Inovacionit.
