Në fshatin Plovisht të Njësisë Administrative Gorë, Bashkia Maliq, është regjistruar një zjarr në një sipërfaqe bujqësore prej 1 hektari. Fatmirësisht nuk ka pasur të lënduar apo humbje jete.
Reagimi i menjëhershëm i strukturave përkatëse bëri të mundur vënien nën kontroll të flakëve brenda pak minutash. Në operacionin për shuarjen e zjarrit u angazhuan 2 mjete zjarrfikëse me 7 efektivë, 10 forca të pyjores, 4 vullnetarë dhe 2 mjete bashkiake. Për garantimin e rendit dhe sigurisë kontribuuan gjithashtu edhe 3 forca të Policisë së Shtetit me 2 automjete.
Sipas të dhënave paraprake të siguruara nga Drejtoria e Pyjeve Maliq, dyshohet se zjarri është shkaktuar nga pakujdesia e disa turistëve që kanë lënë zjarr të ndezur pas qëndrimit të tyre në zonë. Falë ndërhyrjes së shpejtë, flakët nuk arritën të përfshijnë fondin pyjor përreth.
Autoritetet lokale dhe strukturat e mbrojtjes civile kanë bërë thirrje për rritje të kujdesit, sidomos gjatë ditëve me temperatura të larta, për të shmangur situata të rrezikshme që cenojnë mjedisin dhe sigurinë publike.
