Ndërsa Skënderbeu po zhvillon përgatitjet për sezonin e ri me intensitet të lartë dhe skuadra është thuajse e plotë nën drejtimin e trajnerit Ernest Gjoka, dy futbollistë të huaj vazhdojnë të jenë në mungesë të pajustifikuar. Bëhet fjalë për brazilianët Marko Ramos dhe Juri Merlim, të cilët nuk janë bashkuar me skuadrën që prej startit të fazës përgatitore më 25 qershor.
Pavarësisht se kanë kontrata aktive me klubin korçar, asnjëri prej tyre nuk ka dhënë ndonjë arsye zyrtare për mosparaqitjen, çka ka shkaktuar irritim te drejtuesit. Sipas burimeve të brendshme, klubi është në prag të vendosjes së masave disiplinore financiare ndaj të dy lojtarëve, duke aplikuar penalitet për çdo ditë vonese, në përputhje me parashikimet kontraktuale.
Ajo që ka shtuar më shumë dyshimet mbi seriozitetin e Ramos dhe Merlim për të respektuar detyrimet e tyre, është fakti se ata kanë anuluar biletat e kthimit në Shqipëri. Kjo lë të kuptohet se largimi i tyre mund të jetë i qëllimshëm dhe pa dakordësi me klubin.
Në rrjetet sociale, Ramos vijon të jetë aktiv, duke postuar foto nga Brazili, ndërsa në një prej tyre mban veshur edhe fanellën e Skënderbeut. Por ky gjest nuk është parë si sinjal pozitiv nga klubi, që tashmë po shqyrton mundësinë për të ndjekur rrugën ligjore për të zgjidhur situatën me dy brazilianët, nëse ata nuk rikthehen brenda afatit të fundit që do t’u komunikohet.
Skënderbeu ka qenë i prerë në qëndrimin e tij: të gjithë lojtarët janë të detyruar të respektojnë kontratat dhe detyrimet profesionale. Mungesat e pajustifikuara nuk do të tolerohen dhe klubi është i vendosur të ruajë disiplinën dhe seriozitetin në ambientin sportiv.
