Në bashkinë e Maliqit, çmimi i grurit ka shënuar një rritje të ndjeshme këtë vit krahasuar me sezonin e kaluar. Sipas të dhënave nga Drejtoria e Bujqësisë, aktualisht fermerët po e tregtojnë grurin direkt nga fusha me çmime që lëvizin nga 28 deri në 30 lekë për kilogram, ndërkohë që vitin e kaluar ky produkt shitej mesatarisht me 25 lekë/kg.
Kjo rritje e çmimit lidhet me disa faktorë, përfshirë shtimin e kërkesës në treg, rritjen e kostove të prodhimit dhe përmirësimin e cilësisë së grurit në disa zona të fushës së Maliqit.
Megjithatë, jo të gjithë fermerët po përfitojnë në të njëjtën masë. Ata që nuk kanë kapacitete magazinimi janë të detyruar të shesin menjëherë pas korrjes, shpesh me çmime më të ulëta. Ndërkohë, fermerët që kanë kapanone ose magazina po zgjedhin ta ruajnë grurin, në pritje të një çmimi më të favorshëm në javët apo muajt në vazhdim.
Zyrtarët lokalë të bujqësisë shprehen se çmimi përfundimtar i tregut do të qartësohet në përmbyllje të sezonit, por tendencat aktuale janë pozitive dhe në favor të fermerëve.
