Skuadra e Skënderbeut po kalon një nga javët më intensive të verës, duke vijuar me ritëm të lartë përgatitjet për sezonin e ri në Kategorinë e Parë. Kjo është java e katërt e stërvitjeve dhe bardhekuqtë janë të përqendruar si në aspektin fizik, ashtu edhe në lëvizjet e merkatos.
Në klub ka pasur zhvillime të shumta, si në hyrje, edhe në dalje. Largimi më i fundit është ai i Albi Dokës, i cili ka ndërprerë me mirëkuptim bashkëpunimin me Skënderbeun dhe nuk do të jetë më pjesë e ekipit.
Ndërkohë, trajneri Ernest Gjoka është në pritje të afrimeve të reja. Deri më tani është zyrtarizuar vetëm mesfushori Baba Musa, ndërsa shumë pranë nënshkrimit janë edhe Salim Abubakar dhe Victor Gabriel Moura de Oliveira. Të dy lojtarët pritet të bëhen pjesë zyrtare e ekipit në ditët në vijim.
Por merkatoja nuk ndalet këtu. Klubi po punon edhe për 3-4 afrime të tjera për të kompletuar skuadrën para nisjes së sezonit më 23 gusht.
Përveç përforcimeve, stafi teknik është fokusuar edhe në organizimin e miqësoreve verore. Deri tani janë konfirmuar përballjet me Besën, Pogradecin dhe Strugën, të cilat do të zhvillohen pas datës 26 korrik. Gjithashtu, po punohet për të siguruar një kundërshtar edhe për fundjavën në vijim, me synimin për të mos lënë bosh asnjë hapësirë testuese në këtë fazë përgatitore.
Dita e sotme ka qenë sërish e ngarkuar për korçarët, me dy seanca stërvitore – një në mëngjes dhe një pasdite – ndërsa përgatitjet janë në pikun e tyre për një sezon që pritet të jetë i rëndësishëm për objektivat e klubit.
