Në fshatin turistik të Boboshticës, ku natyra dhe tradita shkojnë dorë për dore, turistët e huaj, veçanërisht nga Anglia, po tregojnë gjithnjë e më shumë interes për kulinarinë lokale. Jo vetëm që shijojnë gatimet tradicionale, por së fundmi marrin edhe vetë pjesë në përgatitjen e tyre.
Një nga recetat më të dashura për ta është laktori me dy petë, një gatim karakteristik i juglindjes shqiptare, i njohur për thjeshtësinë dhe shijen autentike.
Amarildo Veizi, guidë turistike, thekson: “Kohët e fundit kemi vënë re një rritje të ndjeshme të interesit të turistëve për jetën rurale. Atyre nuk u mjafton më të vizitojnë, duan të prekin, të ndiejnë, të gatuajnë, të bëhen pjesë e fermave, e traditës dhe kulturës vendase.”
Kultura, arkeologjia, mikpritja dhe kuzhina lokale po e bëjnë Boboshticën një destinacion gjithnjë e më të kërkuar për ata që duan të jetojnë përvojën shqiptare nga afër.
