Vatrat e zjarrit mbi fshatin Vërnik vazhdojnë të jenë aktive, duke përfshirë pyllin me pisha në këtë zonë malore dhe tashmë kanë kaluar vijën e gjelbër, duke hyrë në territorin grek.
Ndërhyrja e shërbimeve zjarrfikëse është tepër e vështirë për shkak të terrenit të thyer malor. Megjithatë, mbi 60 forca zjarrfikëse nga bashkitë e Devollit, Korçës dhe Maliqit janë angazhuar në përpjekjet për shuarjen e flakëve.
Sipas burimeve zyrtare, zjarret në kufi me Greqinë janë përhapur në dy drejtime të ndryshme, duke e bërë edhe më të vështirë përballimin e situatës me mjetet në dispozicion. Për këtë arsye, pritet ndërhyrja nga ajri nga autoritetet greke të shërbimit civil.
Nga flakët është djegur plotësisht bimësia e ulët dhe kullotat që shtrihen nga zona e Vërnikut deri pranë pikës së kalimit kufitar të Kapshticës. Izolimi i zjarrit në disa zona u arrit falë ndërhyrjes së forcave zjarrfikëse në orët e para të mëngjesit.
