Pas pesë vitesh angazhim aktiv politik, Klajdi Pllaha ka njoftuar largimin e tij nga Nisma Thurje. Në një deklaratë publike, ai thekson se arsyeja e largimit lidhet me humbjen e idealizmit që e kishte shtyrë fillimisht të bashkohej me këtë forcë politike.
“Një mik i mençur më pati thënë dikur: ‘Për të njëjtën arsye pse hyn në një parti, për të njëjtën edhe del prej saj.’ Kjo frazë m’u rikthye në mendje kur vendosa të shkëputem nga Nisma Thurje,” shprehet Pllaha.
Ai kujton vitin 2021, kur u angazhua për herë të parë me këtë lëvizje, të cilën atëherë e njihte pak, por e përqafoi me idealizëm dhe besim te pastërtia e të rinjve që kërkonin ndryshim në sistem. “E përfaqësova në tri palë zgjedhje, duke rritur rezultatin dhe duke u pjekur politikisht, pa humbur idealizmin,” thekson ai.
Sipas Pllahës, “ngjarjet e zgjedhjeve të fundit treguan se ky idealizëm është humbur në këtë parti, ose në rastin më të mirë është vënë në hije nga egoja personale apo papjekuria politike.” Ai lë të hapur mundësinë për një reflektim të ardhshëm nga drejtuesit e koalicionit, por thekson se “në këtë moment, nuk mund ta përfaqësoj më Nismën Thurje.”
Duke reflektuar mbi rrugëtimin e tij, Pllaha thekson se nuk pendohet për përfshirjen në këtë lëvizje. “Këto pesë vite më kanë ndihmuar të njoh të rinj të tjerë idealistë, të cilët, fatkeqësisht, janë larguar njëri pas tjetrit nga Nisma,” shprehet ai. “Nuk jam ndjerë i përfshirë realisht në vendimmarrje, ndaj gjithmonë kam qenë më afër qytetarëve të Korçës sesa vetë partisë.”
Ai nënvizon se besimi i votuesve nuk i është dhënë partisë, por atij personalisht: “Jam i sigurt që të gjithë ata që më kanë votëbesuar, ia kanë dhënë besimin Klajdit, jo partisë.”
Pllaha konfirmon se do të vazhdojë angazhimin politik si anëtar i Këshillit Bashkiak në Korçë, tashmë si i pavarur: “Do të jem zëri i qytetarëve korçarë, siç jam ndjerë gjithmonë.”
Në fund të deklaratës së tij, ai mbyll me optimizëm: “Pavarësisht gjithçkaje, unë mbetem pozitiv, duke besuar se të rinj idealistë dhe me karakter nuk do t’i mungojnë kurrë Shqipërisë, madje as politikës. Ndërkohë, le të vazhdojmë të forcojmë zërin qytetar.”
