Në kuadër të bashkëpunimit ndërmjet Drejtorisë së Përgjithshme të Burgjeve, Ambasadës së Mbretërisë së Bashkuar, Agjencisë Kombëtare të Punësimit dhe Aftësive (AKPA), si dhe Qendrës Rajonale të Formimit Profesional Korçë, së shpejti në Institucionin e Ekzekutimit të Vendimeve Penale (IEVP) Korçë do të ofrohen kurse profesionale në fushat instalime hidraulike dhe rrobaqepësi.
Personat e privuar nga liria që shfaqin interes do të kenë mundësinë të fitojnë aftësi të reja, duke u përgatitur për një të ardhme më të mirë dhe integrim të suksesshëm në tregun e punës pas përfundimit të dënimit.
Me mbështetjen e Mbretërisë së Bashkuar, janë siguruar pajisjet dhe infrastruktura e nevojshme për zhvillimin cilësor të trajnimeve.
Në këtë kuadër, drejtori i IEVP Korçë, z. Lorent Nake, priti në një vizitë zyrtare Drejtoreshën e Qendrës së Formimit Profesional Korçë. Qëllimi i takimit ishte koordinimi për fillimin e kurseve dhe garantimi i kushteve optimale për realizimin e tyre.
