Në fshatin Drithas të Maliqit, u zhvillua festa tradicionale e bukës së re, një ngjarje që prej vitesh mbledh banorë dhe vizitorë në një atmosferë plot gëzim e ngrohtësi. Eventi u shoqërua me këngë dhe valle popullore, duke sjellë në qendër të vëmendjes bukurinë e traditave lokale dhe energjinë e komunitetit.
Moment i veçantë i festës ishte ndarja simbolike e bukës së re nga kryetari i bashkisë, Gëzim Topçiu, i cili theksoi rëndësinë e këtij aktiviteti për ruajtjen dhe promovimin e trashëgimisë kulturore të zonës.
Pjesëmarrësit, banorë e vizitorë, shprehën entuziazmin e tyre për një festë që jo vetëm nderon prodhimin bujqësor dhe punën e fermerëve, por gjithashtu shërben si një pikë bashkimi mes brezave dhe si një mënyrë për të përcjellë vlerat tradicionale tek të rinjtë.
