Merkatoja e Skënderbeut nuk është mbyllur ende. Burime pranë klubit korçar bëjnë me dije se ditët e ardhshme pritet të mbërrijnë edhe dy futbollistë të rinj, duke shtuar konkurrencën në grupin e drejtuar nga Ernest Gjoka. Ende nuk është sqaruar nëse bëhet fjalë për zëvendësime të mundshme, apo për përforcime shtesë me synimin për të rritur cilësinë e skuadrës.
Ndërkohë, përsa i përket lojtarëve aktualë, drejtuesit e bardhekuqve kanë vendosur një politikë të prerë: kushdo që kërkon të largohet, duhet të sigurojë minimalisht 300 mijë euro në arkat e klubit. Me këtë strategji, Skënderbeu u jep një mesazh të qartë rivalëve dhe ekipeve të interesuara, se nuk është i gatshëm të humbasë lehtë lojtarët më të rëndësishëm.
Ky qëndrim tregon vendosmërinë e klubit për të mos dobësuar ekipin në prag të sezonit, por për ta forcuar akoma më shumë, me synimin e vetëm: rikthimin në elitën e futbollit shqiptar.
