Fermerët, kryesisht blegtorë të fshatit Çërravë, kanë protestuar ditën e sotme kundër dhënies me qira të një pjese të tokave të këtij fshati një subjekti privat. Sipas banorëve, këto sipërfaqe janë përdorur prej vitesh si kullota për blegtorinë, ndaj edhe kanë kundërshtuar vendimin e Këshillit Bashkiak të Pogradecit për t’i dhënë me qira për ndërtimin e paneleve fotovoltaike.
Banorët thonë se vit pas viti kanë investuar dhe janë orientuar drejt blegtorisë, duke u bërë kështu të varur nga këto toka për ushqimin e bagëtive. Për këtë arsye, ata kanë shprehur hapur pakënaqësinë e tyre në dëgjesën publike të organizuar nga Bashkia Pogradec.
Nga burime pranë institucionit mësohet se subjekti privat, që ka marrë në përdorim sipërfaqet në fjalë, planifikon të ndërtojë aty një park fotovoltaik.
