Këshilli i Qarkut Korçë ka nisur regjistrimet për projektin e ri “20 Udhërrëfyes Turistikë Lokalë për Qarkun Korçë”, një iniciativë që synon të certifikojë të rinjtë e interesuar në fushën e turizmit lokal. Projekti realizohet në bashkëpunim me Universitetin “Fan S. Noli” dhe përfshin një kurs tremujor të akredituar nga Ministria e Turizmit dhe Ministria e Arsimit, i cili do të mbulohet plotësisht financiarisht nga Këshilli i Qarkut.
Të rinjtë që do të përzgjidhen do të trajnohen për udhërrëfyerinë lokale, ndërsa më të mirët do të kenë mundësi edhe për të zhvilluar idetë e tyre në turizmin lokal. Aplikimet online janë të hapura deri më 5 shtator, ndërsa intervistat me specialistët e Këshillit do të zhvillohen pas aplikimit. Kursi do të nisë më 19 shtator në Universitetin “Fan Noli”, duke shënuar fillimin e sezonit të parë për këtë program të ri.
Ky projekt ofron mundësi unike për të pasionuarit pas natyrës, kulturës dhe historisë së Qarkut Korçë, që duan ta kthejnë këtë pasion në një profesion të vlerësuar dhe të certifikuar.
