Korça po e forcon gjithnjë e më shumë profilin e saj si qytet i dijes dhe inovacionit, duke i ofruar fëmijëve dhe të rinjve mundësi të reja për t’u futur në botën e teknologjisë. Në bashkëpunim me Albanian ICT Academy, Bashkia Korçë ka hapur regjistrimet për një sërë kursesh të kërkuara në fushën e programimit dhe teknologjisë së informacionit.
Të apasionuarit pas teknologjisë mund të ndjekin kurse të tilla si kodim, programim në Python, C++ dhe Java, web design, grafik design, modelim 3D, editim videosh, Unity dhe JavaScript. Një mundësi e veçantë është fakti se Bashkia Korçë financon 50% të tarifës së kursit, duke e bërë këtë iniciativë të aksesueshme për më shumë të rinj.
Regjistrimet bëhen online, ndërsa informacion shtesë ofrohet pranë sporteleve të Bashkisë dhe Bibliotekës “Thimi Mitko”. Kjo nismë është pjesë e vizionit për të kthyer Korçën në një qendër të teknologjisë dhe informacionit në juglindje të vendit, duke përgatitur gjeneratën e re për tregun e punës së së ardhmes.
