Sot, më 26 gusht, shënohet Dita Botërore e Qenve, një rast për të rikujtuar rëndësinë e kujdesit dhe trajtimit të këtyre kafshëve. Në Korçë, Bashkia ka hedhur idenë e një qendre për strehimin dhe trajtimin e qenve endacakë, një projekt që synon të zgjidhë një problem të hershëm të qytetit.
Qendra e cila po përfundon rikonstruksionin e një godine në rrugën e Voskopojës brenda bazës prodhuese të shkollës bujqësore, do të ketë kapacitet për 50 qen, të cilët do të trajtohen dhe sterilizohen nga mjekë veterinerë. Bashkia po bashkëpunon me veterinerë privatë për të rritur kapacitetin operativ në terren dhe për të menaxhuar më mirë kafshët endacakë në qytet.
Ky projekt shërben si një rikujtim nga pushteti lokal për qytetarët dhe komunitetin, që të angazhohen në kujdesin ndaj kafshëve dhe të mbështesin përpjekjet për të ulur incidentet dhe për të përmirësuar sigurinë dhe mirëqenien e kafshëve në rrugët e Korçës.
