Bashkia Maliq ka hapur sot procesin e dëgjesave publike për Projekt-Buxhetin Afatmesëm 2026-2028, një praktikë që synon përfshirjen e qytetarëve dhe grupeve të interesit në planifikimin e politikave zhvillimore të territorit.
Takimet e para u zhvilluan në Njësinë Administrative Pirg dhe në Njësinë Administrative Vreshtas, ku përfaqësues të bashkisë, komuniteti dhe grupet e interesit diskutuan hapur mbi punët e realizuara gjatë viteve të fundit, problematikat që ende kërkojnë zgjidhje dhe prioritetet kryesore që duhet të pasqyrohen në buxhetin e ri.
Në këto takime u theksua rëndësia e investimeve në infrastrukturë, shërbime publike, zhvillimin bujqësor dhe përmirësimin e cilësisë së jetës për banorët e zonave rurale. Banorët e pranishëm paraqitën edhe kërkesat dhe shqetësimet e tyre, duke kontribuar drejtpërdrejt në procesin e vendimmarrjes.
Ky tur dëgjesash do të vijojë në të gjitha njësitë administrative të Bashkisë Maliq, me synim që çdo komunitet të ketë mundësinë të shprehë prioritetet e veta dhe të ndikojë në mënyrë transparente në hartimin e buxhetit afatmesëm.
Bashkia Maliq ka bërë të ditur se këto takime janë thelbësore për ndërtimin e një buxheti të balancuar, të orientuar drejt nevojave reale të qytetarëve dhe për rritjen e përgjegjshmërisë institucionale.
