Pas viteve të fundit të mbushura me trofe, ekipi i volejbollit për femra i Skënderbeut është ribërë pothuajse nga e para. Krahas largimit të lojtareve të huaja, nga skuadra janë shkëputur edhe disa prej titullareve shqiptare, mes tyre kapitenia Bego dhe libero Mehmeti.
Aktualisht, bazën e ekipit e përbëjnë lojtaret korçare 18–20 vjeçare, të cilat sezonin e kaluar u shpallën kampione kombëtare me ekipet e moshave U18 dhe U20. Megjithatë, përvoja e tyre ende nuk është e mjaftueshme për të përballuar plotësisht nivelin e lartë të Superiores.
Me afrimin e dy lojtareve të tjera të huaja, grupi duket më i plotësuar dhe synimi i sezonit mbetet maksimumi. Për ta arritur këtë, stafi teknik thekson se kërkohet punë e madhe në stërvitje, jo vetëm me dy seanca ditore, por edhe me programe të diferencuara për lojtaret që i janë bashkuar më vonë ekipit.
Humbja e fundit ndaj Pogradecit (18–25, 24–26, 28–30) tregoi se Skënderbeu nuk ka asgjë më pak se rivalët e tij. Sezoni sapo ka nisur dhe trajnerët Haxhillari e Shishi, bashkë me lojtaret, shprehen të gatshëm të investojnë gjithçka për t’u përballur denjësisht me çdo skuadër, përfshi edhe ato që kanë investuar ndjeshëm këtë vit.
