Agjencia Shtetërore e Kadastrës njoftoi se në zonën e Vithkuqit po shkon drejt përfundimit pajisja me titull pronësie, për banorët e fshatit.
Drejtoria Vendore e Kadastrës Korçë-Devoll-Kolonjë u bëri thirrje banorëve të fshatit Vithkuq, të cilët ende nuk janë pajisur me dokumentacion pronësie për banesat e tyre, të përfitojnë nga mundësia për të aplikuar online përmes platformës “e-Albania”.
Sipas ASHK-së, shërbimi për të cilin duhet të aplikojnë qytetarët është: “Kërkesë për kalimin e pronësisë së objektit pa titull/truallit funksional/oborrit në përdorim”.
Ky shërbim është i vlefshëm për objektet e ndërtuara para datës 10.08.1991, si dhe për truallin funksional dhe oborret që janë në përdorim nga banorët.
ASHK bën të ditur se, deri tani rreth 100 banorë të Vithkuqit që janë pajisur me titullin e pronësisë.
Tashmë ata mund të regjistrojnë pasuritë e tyre dhe të përfitojnë: certifikatën e pronësisë; hartën kadastrale dhe kartelën e pasurisë së paluajtshme.
Ky proces nuk kërkon pagesë të menjëhershme dhe është një mundësi e vlefshme për të garantuar sigurinë juridike të pronës private. Aplikimi bëhet lehtësisht online në portalin e-albania.al.
Drejtoria Vendore Korçë-Devoll-Kolonjë e Kadastrës inkurajon të gjithë banorët që plotësojnë kriteret të mos e humbin këtë mundësi dhe të përfitojnë nga një proces i thjeshtuar dhe i digjitalizuar për legalizimin e pronës.
