Në Pazarin e Vjetër të Korçës është çelur ekspozita “Telat e dashurisë”, një udhëtim nostalgjik mes kitarave dhe mandolinave që kanë shoqëruar serenatat korçare ndër vite.
Eventi, i zhvilluar në dyqanin e “Pllaton Bubuqit”, solli për publikun instrumentet muzikore të mjeshtërve që kthyen këngën e qoshkave në art, mes tyre Ilia Vinjau, Gjergji Peleshi, familjet Furxhiu e Suljoti, Vangjush Tushi, Naum Tërova e shumë të tjerë.
Sipas drejtoreshës së Qendrës së Artit dhe Kulturës, Blerta Belliu, kjo ekspozitë është një homazh për trashëgiminë kulturore të qytetit dhe për serenatistët që i dhanë shpirt Korçës.
