Drejtori i Përgjithshëm i Doganave, Genti Gazheli, zhvilloi sot një vizitë pune në Doganën e Qafë Thanës, një nga pikat më të rëndësishme kufitare të Shqipërisë me Maqedoninë e Veriut.
Gjatë inspektimit, ai u njoh nga afër me punën e stafit doganor, sfidat e përditshme dhe rezultatet e arritura deri më tani. Gazheli vlerësoi përkushtimin e punonjësve dhe theksoi se rritja e performancës së administratës është thelbësore për të përmbushur pritshmëritë e qytetarëve dhe bizneseve.
“Standardet e larta në shërbimet doganore janë një detyrim ndaj qytetarëve dhe sipërmarrjes. Vetëm me profesionalizëm dhe përkushtim mund të ecim përpara drejt vizionit tonë ‘Dogana 2030’,” u shpreh Gazheli.
Duke iu referuar objektivave strategjikë, kreu i Doganave nënvizoi rolin e rëndësishëm të administratës doganore në rrugëtimin e Shqipërisë drejt integrimit europian.
“Dogana shqiptare është pjesë e pandashme e rrugës drejt ‘Shqipërisë Europiane’. Çdo hap përmirësimi përkthehet në shërbim më cilësor dhe në afrimin më të shpejtë me Bashkimin Europian,” shtoi ai.
Vizita në Qafë Thanë u konsiderua një mundësi për të forcuar bashkëpunimin me stafin në terren dhe për të garantuar zbatimin e reformës doganore me transparencë dhe efikasitet.
