Policia e Korçës ka vijuar punën intensive gjatë ditëve të fundit, duke ndërhyrë në raste të ndryshme penale, aksidente dhe konflikte qytetare.
Specialistët për Hetimin e Krimeve ndaj Personit ekzekutuan masën e sigurisë “Arrest në burg” për shtetasin E. A., 21 vjeç, banues në fshatin Buçimas, i akuzuar për veprat penale “Plagosja e rëndë me dashje”, “Shkatërrimi i pronës” dhe “Prishja e qetësisë publike”.
Ndërkohë, specialistët e Sektorit të Qarkullimit Rrugor arrestuan në flagrancë shtetasin R. A., 32 vjeç, banues në fshatin Dolan, pasi u kap duke drejtuar automjetin në gjendje të dehur. Gjithashtu, për shtetasin K. Gj., 28 vjeç, banues në fshatin Cangonj, ka nisur procedimi penal, pasi automjeti që drejtonte u përplas në hyrje të qytetit të Bilishtit me një tjetër automjet të drejtuar nga shtetasi F. Zh., 70 vjeç. Nga aksidenti u dëmtua lehtë pasagjerja e automjetit të shtetasit F. Zh.
Specialistët e Sektorit të Narkotikëve referuan në Prokurori shtetasin A. M., 61 vjeç, banues në Korçë, pasi gjatë kontrollit iu gjet një sasi lënde e dyshuar narkotike kanabis. Po ashtu, shërbimet e Komisariatit të Policisë Korçë referuan materialet në Prokurori pas një konflikti verbal mes shtetasve I. D., 65 vjeç, dhe V. D., 71 vjeç, për motive pronësie.
Të gjitha materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Korçë për veprime të mëtejshme.
