Në mjediset e Fakultetit të Bujqësisë, u zhvillua sot një ceremoni e veçantë nderimi për znj. Feskë Hoxha, laborante pranë departamentit të Agronomisë, e cila pas rreth 15 vitesh pune e përkushtuar doli në pension.
Në prani të drejtuesve të Universitetit, stafit akademik e administrativ, studentëve, familjarëve dhe miqve, znj. Hoxha u vlerësua me Certifikatë Mirënjohjeje për kontributin e saj të çmuar në funksionimin e këtij fakulteti.
Dekani i Fakultetit të Bujqësisë, prof. as. dr. Besnik Skënderasi, theksoi rolin e saj të rëndësishëm si një bashkëpunëtore e përkushtuar dhe model profesionalizmi, ndërsa kolegët e pedagogët e pranishëm vlerësuan urtësinë dhe korrektësinë e saj në shërbim të stafit dhe studentëve.
Nga ana e tij, rektori i Universitetit “Fan S. Noli”, prof. dr. Lorenc Ekonomi, i dorëzoi znj. Hoxha Certifikatën e Mirënjohjes, duke vlerësuar pasionin dhe etikën e saj të lartë në punë, që e kanë bërë një figurë të dashur e të respektuar.
E emocionuar, znj. Feskë Hoxha falënderoi drejtuesit dhe kolegët për këtë vlerësim, duke ndarë me ta momente të veçanta nga përvoja e saj shumëvjeçare në Fakultetin e Bujqësisë.
