Në qarkun e Korçës, policia ka kryer gjatë 24 orëve të fundit disa veprime ligjore, duke arrestuar dhe proceduar disa shtetas për shkelje të ndryshme, që nga drejtimi pa leje e deri te rastet e dhunës dhe pronës.
Në Devoll, specialistët e Qarkullimit Rrugor arrestuan në flagrancë shtetasin A. L., 35 vjeç, banues në fshatin Libonik, pasi u kap duke drejtuar motomjetin pa leje drejtimi.
Ndërkohë, në Maliq, nisi procedimi penal për M. K., 65 vjeç, i cili, duke drejtuar automjetin, ka përplasur lehtë një këmbësor 64-vjeçar, i cili ndodhet jashtë rrezikut për jetën.
Në qytetin e Korçës, policia po heton disa raste të dhunës për motive të dobëta.
Materialet u referuan në Prokurori për S. Dh., 42 vjeçe, e cila dyshohet se ka ofenduar dhe goditur një vajzë 13-vjeçare; për B. R., 58 vjeç, që dyshohet se ka goditur me sende të forta dhe ka kanosur me thikë një 31-vjeçar; si dhe për R. H., 31 vjeç, dhe një shtetas ende të paidentifikuar, të cilët janë shpallur në kërkim, pasi kanë goditur me grushta një 37-vjeçar që po merr mjekim në spital.
Një tjetër rast u regjistrua në Bilisht, ku specialistët për Hetimin e Krimeve ndaj Personit shpallën në kërkim shtetasin V. Sh., alias F. Sh., 35 vjeç, me probleme të shëndetit mendor, pasi ka goditur me thikë në fytyrë dhe në dorë xhaxhain e tij.
Ndërsa në fshatin Klocë, është proceduar penalisht J. M., 26 vjeç, pasi automjeti që drejtonte rezultoi i vjedhur në shtetin gjerman. Mjeti u sekuestrua në cilësinë e provës materiale.
Materialet procedurale për të gjitha rastet iu referuan Prokurorisë pranë Gjykatës së Shkallës së Parë të Juridiksionit të Përgjithshëm Korçë, për veprime të mëtejshme hetimore.
