Në fshatin piktoresk të Rehovës u mbajt edicioni i parë i Festivalit “Etno Kids”, një aktivitet unik që synon të përcjellë te brezat e vegjël dashurinë për trashëgiminë kulturore shqiptare.
Me mbështetjen e Këshillit të Qarkut Korçë dhe Bashkisë Kolonjë, sheshet e gurta të Rehovës u mbushën me zërat, ngjyrat dhe emocionet e qindra fëmijëve pjesëmarrës, që erdhën nga shumë zona të vendit për të interpretuar këngë, valle dhe për të prezantuar elementë të etnografisë shqiptare.
Festivali, i cili synon të kthehet në një traditë të përvitshme, u përshëndet me entuziazëm nga të pranishmit dhe nga organizatorët që theksuan rëndësinë e edukimit kulturor përmes artit popullor.
Në përfundim të aktivitetit u dha edhe një lajm i gëzueshëm: duke filluar nga pranvera e vitit të ardhshëm, Bashkia Kolonjë do të nisë organizimin e Festivalit Folklorik Kombëtar për Fëmijë, ku do të marrin pjesë grupe artistike nga të 12 qarqet e Shqipërisë.
Kjo nismë e re pritet të forcojë ndërlidhjen mes brezave dhe të rikthejë vëmendjen te vlerat e pasura të folklorit dhe trashëgimisë sonë kulturore.
