Drejtoria Vendore e Policisë Korçë ka referuar materialet në Prokurori, ku nisi procedimi penal për disa shtetas të përfshirë në veprimtari të kundërligjshme.
Në aksin rrugor “Maliq–Korçë”, shërbimet e Policisë kapën shtetasit U. B., 36 vjeç, banues në Pogradec, dhe K. H., 32 vjeç, banues në fshatin Mesmal, duke transportuar me mjetet e tyre lëndë drusore të prerë në mënyrë të paligjshme. Lënda drusore u sekuestrua në cilësinë e provës materiale.
Gjithashtu, u procedua penalisht shtetasi E. R., i kapur duke kryer punime ndërtimi pa leje, si dhe K. R., në Maliq, për të njëjtën vepër.
Ndërkohë, më datë 10 tetor 2025, është paraqitur në Komisariatin e Policisë Korçë shtetasi E. A., i cili ka kallëzuar largimin nga banesa të djalit të tij 17-vjeçar. Po punohet për gjetjen e tij.
Po ashtu, 73-vjeçari Gj. B. ka denoncuar se persona të paidentifikuar i kanë vjedhur disa pajisje elektroshtëpiake nga banesa. Policia po punon për identifikimin dhe kapjen e autorëve.
Materialet procedurale i janë referuar Prokurorisë së Korçës për veprime të mëtejshme.
