Korça u mbush këtë fundjavë me tinguj, ngjyra dhe emocione gjatë ditës së parë të Festivalit Ndërkombëtar të Bandave Frymore – “LULU FEST”, një ngjarje e re kulturore që pritet të kthehet në traditë për qytetin e serenatave.
Dita nisi me ekspozitën “Kur koha marshon” në Zonën Këmbësore, një udhëtim përmes kujtesës dhe historisë së muzikës frymore, ku publiku pati mundësinë të njihte nga afër instrumente, foto dhe momente që dëshmojnë rrënjët e pasura të kësaj tradite.
Në vijim, artistë dhe instrumentistë morën pjesë në Masterclass-in e zhvilluar në Qendrën e Artit dhe Inovacionit, një hapësirë e krijuar për ndarjen e përvojave dhe shkëmbimin e ideve mes brezave të muzikantëve.
Mbrëmja kulmoi me Paradën e Bandave, ku bulevardet e qytetit u mbushën me ritme frymore, kostume shumëngjyrëshe dhe duartrokitjet e qindra qytetarëve e vizitorëve që ndoqën spektaklin muzikor.
“LULU FEST është më shumë se një festival – është një homazh për artin frymor, për traditën korçare dhe për mjeshtrit që e kanë bërë këtë qytet të tingëllojë ndryshe,” – theksuan organizatorët, duke e konsideruar këtë edicion si fillimin e një tradite të re që bashkon muzikën, kulturën dhe identitetin lokal.
Korça edhe një herë dëshmoi se është qyteti ku arti frymon në çdo cep, me ritmin e shpirtit të saj të veçantë.
