Drejtoria Vendore për Kufirin dhe Migracionin Korçë ka goditur një tjetër rast kontrabande në kufirin juglindor të vendit.
Në kuadër të kontrolleve të shtuara për parandalimin dhe goditjen e paligjshmërive në kufi, shërbimet e Policisë Kufitare në Pikën e Kalimit të Kapshticës kanë arrestuar në flagrancë një 54-vjeçar, drejtues autobusi, i cili tentoi të fuste në Shqipëri veshje të kontrabanduara nga Greqia.
Gjatë kontrollit të detajuar në vijën e dytë, në autobusin që drejtohej nga shtetasi N. Z., banues në fshatin Neviçisht të Korçës, u gjetën sasi të konsiderueshme veshjesh që nuk ishin të pajisura me dokumentacion përkatës, me vlerë të përafërt rreth 100 mijë euro.
Pas veprimeve procedurale, 54-vjeçari u arrestua në flagrancë për veprën penale “Kontrabanda me mallra të tjera”, ndërsa materialet iu referuan Prokurorisë së Korçës për veprime të mëtejshme hetimore.
