Një tjetër pasuri i shtohet fondit të Muzeut Kombëtar të Artit Mesjetar në Korçë.
Një nga ikonat më të rralla të fondit muzeal, “Shën Kolli me skena në miniaturë”, është restauruar me sukses, duke iu kthyer shkëlqimi dhe vlera artistike që kishte humbur ndër vite.
Kjo ikonë është pikturuar në dekadat e fundit të shekullit të XVI, dhe i atribuohet mjeshtrit Jorgo Klonxa, një nga emrat më të rëndësishëm të artit ikonografik të periudhës pas-onufriane. Në qendër të ikonës paraqitet Shën Kolli (figura kryesore, mjaft e dëmtuar ndër vite), i rrethuar nga 40 skena në miniaturë, të cilat tregojnë episode të jetës dhe mrekullive të shenjtorit.
Veprës i ishte humbur lexueshmëria për shkak të djegieve, plasaritjeve dhe vernikut të oksiduar, që e kishin bërë të pamundur dallimin e detajeve origjinale. Falë ndërhyrjes profesionale të restauratorëve, ikona është rikthyer tashmë në gjendje të ekspozueshme dhe do të pasurojë më tej fondin e pasur të Muzeut Kombëtar të Artit Mesjetar në Korçë, i cili numëron mbi 7200 ikona të trashëgimisë sonë shpirtërore dhe artistike.
Ky restaurim është një tjetër dëshmi e kujdesit dhe përkushtimit për ruajtjen e pasurisë kulturore që përfaqëson një ndër periudhat më të ndritura të artit ikonografik shqiptar.
