Korça çel sot edicionin e 15-të të “Ditëve të Mios”, një prej aktiviteteve më të dashura kulturore që nderon mjeshtrin e madh të penelit, Vangjush Mio. Nga data 28 deri më 31 tetor, qyteti do të kthehet në një atelie të hapur arti, ku rreth 40 piktorë nga vende të ndryshme të botës do të sjellin ngjyrat, dritën dhe frymën krijuese në çdo cep të Korçës.
Piktorët do të eksplorojnë rrugicat karakteristike të qytetit, peizazhet e fshatrave përreth dhe do të përpiqen të kapin në telajo magjinë e vendit që i dha jetë pikturës shqiptare. Për katër ditë me radhë, Korça do të pulsojë në ritmin e artit, duke u kthyer në një qendër frymëzimi për të gjithë dashamirësit e kulturës dhe krijimtarisë.
Ceremonia zyrtare e hapjes do të zhvillohet sonte, më 28 tetor, në orën 19:00, në Shtëpinë Muze “Vangjush Mio”, aty ku historia dhe arti bashkohen për të kujtuar trashëgiminë e një artisti që la gjurmë të pashlyeshme në identitetin kulturor të Korçës.
“Ditët e Mios” mbeten një udhëtim i jashtëzakonshëm përmes ngjyrave, peizazheve dhe shpirtit krijues që e bën Korçën të veçantë në çdo stinë.
