Për të dytin vit radhazi organizohet në aerodromin e Lumalasit në Korçë, kampionati i fluturimeve të lira “Korça Open Air”, ku kanë marrë pjesë pilotët më të njohur shqiptarë por e të ardhur nga vende të ndryshme të Europës.
Për presidentin e federatës së aeronautikës Alket Islami, Lumalasi ofron kushte të përshtatshme për fluturime të këtij lloji madje me përfundimin e terminalit të aeroportit krijohen kushte fluturimi për pilotë që vijnë nga vende të huaja.
“Lumalasi është qershia mbi tortë në Korçë për sportet e ajrit, këtë vit dhe vjet por vjet nuk kishte mbaruar infrastruktura, është test për 2029 per zhvillimin e kampionatit botëror, pasi Korça e meriton, madje e terminali mbrapa krahëve tanë është luks me gjithë shërbimet shtesë, çdo gjë është gati të bëhen evente me të mëdha ndërsa ky event ka pilotët me të mirë të Europës.”
Migjen Shala eshte nga pilotët e top listës së fluturimeve europiane, madje se bashku me pjesëtarë të tjerë të familjes janë nga pilotët më të mirë europiane të grupmoshave të ndryshme.
“Nuk ka qenë e lehtë pasi të renditesh në top 10 e botës përpiqemi të shkojmë në top 3 me të mirë të botës. Ne fluturojmë me vëllain, vajzën e vëllait dhe djalin tim. Djali im është i 18 i botës dhe junior i tretë i botës. Çdo garë është emocion sidomos kur ke pjesëtarët e familjes.”
Antonio Shvolcak është piloti slloven që ka nisur këtë sport në 1978 dhe ende sot ka fuqi të ngrihet, duke fituar çmime të rëndësishme në karrierë.
“Kam nisur si parashutist në vitin 1978, ndërsa në Korçë kam qenë në 2011. Vazhdoj ende të fluturoj, kryesisht me stile të lira, sot do të fluturoj përsëri. Kam qenë në vende të ndryshme të Shqipërisë ndërsa kam fituar çmime kampion në disa vende të Ballkanit. Do fluturoj sa të kem fuqi.”
Mbi 40 parashutistë nga Shqipëria, rajoni dhe bota do të jenë në Korçë për 3 ditë, ndërsa ky sport po merr një hov edhe për shkak të investimeve vitet e fundit.
