Ekipi i Devollit në futboll nuk ka arritur të dalë me pikë nga transfertë e kësaj jave, teksa është mposhtur me rezultatin 5-3 nga Bylysi “B”. Ky është takimi i katërt i humbur në pesë javët e para të kampionatit, duke e vënë skuadrën devollite në një moment të vështirë rezultatesh.
Ashtu si në përballjen e mëparshme ndaj Partizanit “B”, edhe këtë të shtunë Devolli ka pranuar të luajë në ditën e kërkuar nga skuadra rivale. Bylysi “B”, ashtu si Partizani “B”, ka në përbërje lojtarë që aktivizohen edhe në Superiore, faktor që ka influencuar dukshëm në forcën e kundërshtarit dhe ritmin e lojës.
Pavarësisht përpjekjeve për të rivalizuar rezultatin, ekipi devollit nuk ka mundur të shmangë humbjen, dhe jo vetëm kaq, por ka pësuar një tjetër disfatë të thellë, që shton presionin për të reaguar në javët e ardhshme.
Stafi teknik dhe futbollistët e Devollit pritet të analizojnë gabimet dhe të punojnë për t’u rikthyer te rezultatet pozitive, ndërsa kampionati është ende në fazën e parë dhe ka hapësirë për rikuperim.
