Për të 8-tin vit radhazi, Kolonja është shndërruar në një atelie të hapur arti, ku mbi 45 piktorë nga trojet shqipfolëse po sjellin në telajo ngjyrat dhe magjinë e vjeshtës në këtë krahinë të bukur të juglindjes.
Për tre ditë me radhë, artistët po pikturojnë peizazhet e veçanta, monumentet kulturore dhe atraksionet turistike që ofron Kolonja – nga mali i Gramozit e deri në kishën e Borovës, nga Rehova e deri në Qafën e Qarrit.
Piktorët pjesëmarrës e përshkruajnë këtë edicion si më të veçantin, falë atmosferës së ngrohtë dhe ngjyrave të pasura që ka sjellë vjeshta.
“Kam ardhur disa herë në Kolonjë, madje edhe privatisht, sepse më pëlqen shumë relievi dhe mali i Gramozit – një skulpturë në natyrë. Këtë vit, vjeshta këtu është më e bukur se në Korçë apo Pogradec. Po kënaqemi duke pikturuar.” është shorehur piktori Pashk Përvathi.
Një tjetër piktor pjesëmarrës ka thënë: “Çdo vit është më bukur se më parë. Po pikturoj malin e Gramozit dhe Ersekën. Kolonja është frymëzim i pafund.”
“Kolonja ka peizazhe që të mahnisin, nga Qafa e Qarrit deri në Leskovik. Sot po pikturoj kishën e Borovës, një vend që të flet vetë me historinë e tij.” është shprehur një tjetër artiste.
Kuratori i kolonisës, Fatmir Toçi, thekson se kjo veprimtari është kthyer tashmë në një traditë të përvitshme që bashkon artistë nga Shqipëria, Kosova, Maqedonia e Veriut dhe Mali i Zi, duke i dhënë jetë një dimensioni të ri kulturor dhe turistik për Kolonjën.
“Kjo është kolonia e 8-të që zhvillohet në Kolonjë. Arti këtë herë është në shërbim të zhvillimit turistik dhe promovimit të zonës. Piktorët po japin një kontribut të çmuar për ta bërë Kolonjën më të njohur përmes veprave të tyre.”
Në përmbyllje të aktivitetit, një pjesë e pikturave të realizuara do t’i dhurohen fondit të Galerisë së Arteve në Kolonjë, duke pasuruar më tej trashëgiminë kulturore të kësaj treve që çdo vjeshtë e kthen artin në festë.
