Kryetari i Bashkisë së Korçës, Sotiraq Filo, mirëpriti sot në një takim zyrtar Ambasadorin e Palestinës në Shqipëri, z. Sami Mhanna. Vizita u zhvillua në ambientet e bashkisë dhe u fokusua në forcimin e marrëdhënieve mes dy palëve, si dhe në identifikimin e fushave ku mund të nisin projekte të përbashkëta.
Gjatë bisedës, kryebashkiaku Filo dhe ambasadori Mhanna shkëmbyen ide dhe propozime konkrete mbi bashkëpunimin në sektorët e kulturës, edukimit dhe aktiviteteve të tjera me interes të përbashkët. Të dy palët vlerësuan mundësinë për organizimin e iniciativave kulturore, shkëmbime rinore, si dhe programe që nxisin dialogun dhe miqësinë mes komuniteteve.
Vizita e ambasadorit u konsiderua një hap i rëndësishëm drejt forcimit të lidhjeve me partnerë ndërkombëtarë dhe hapjes së Korçës ndaj bashkëpunimeve të reja në nivel rajonal dhe global. Kryetari Filo shprehu gatishmërinë e bashkisë për të intensifikuar këto marrëdhënie dhe për të materializuar projektet që do të sjellin përfitime për komunitetin.
