Gjykata e Korçës ka vendosur të ndryshojë masën e sigurisë për Leonidha Guçen dhe Denis Meçen, të akuzuar për vrasjen me dashje, kryer në bashkëpunim, të 34-vjeçarit Egli Proga, ngjarje e ndodhur më 10 gusht 2024 në lokalin “Stropcka”.
Sipas burimeve brenda gjykatës, për të dy të pandehurit ka përfunduar afati ligjor i paraburgimit, çka ka detyruar gjykatën të caktojë masën më të lehtë të sigurisë “Arrest shtëpie”, deri në përfundimin e hetimeve.
Hetimet aktualisht kanë ngecur në procesin e zbardhjes së pamjeve të kamerave të sigurisë të sekuestruara në vendngjarje. Pjesë të materialeve filmike, të cilat dyshohet se janë fshirë nga pajisjet e lokalit, janë dërguar jashtë Shqipërisë për ekspertim të specializuar me qëllim rikthimin e tyre. Pala mbrojtëse ka argumentuar se vonesat në sigurimin e provave të plota kanë sjellë zvarritje të hetimit, duke kërkuar ndryshimin e masës së sigurisë për të pandehurit.
Në pritje të përgjigjeve nga ekspertiza ndërkombëtare, të dy të akuzuarit do të vijojnë të jenë nën masën e arrestit shtëpiak, ndërsa procedimi penal për vrasje me dashje vijon në fazën e hetimit.
