Më shumë se 700 pula kanë ngordhur si pasojë e përmbytjes së fermës së Artan Zhivës në Pirg. Pronari i fermës tregon se përmbytja ndodhi për shkak të kanalit pranë fermës, i cili nuk është pastruar prej tre vitesh, duke shkaktuar grumbullimin e ujit dhe shkatërrimin e kafshëve.
“Dëmi në fermë është shumë i madh, mbi 10 milionë lekë. Kjo nuk është vetëm një fatkeqësi natyrore, por rezultat i neglizhencës për pastrimin e kanalit,” shprehet pronari, i cili kërkon nga shteti masa të menjëhershme për dëmshpërblim.
Banorët lokalë theksojnë gjithashtu se prej një jave një mjet fadromë, i cili mund të kishte ndihmuar në pastrimin e rrugës dhe largimin e ujërave, ka qëndruar i parkuar pa funksion, duke mos kryer asnjë punë për shkak të mungesës së naftës.
