Tre automjete u përplasën këtë mëngjes në Unazën Veriore të Korçës, në një zonë të njohur për fluksin e lartë të mjeteve gjatë orëve të shkollës. Përplasja ndodhi në një kryqëzim që të çon drejt dy shkollave të qytetit, teksa drejtuesit po shoqëronin fëmijët e tyre.
Sipas informacioneve paraprake, një nga drejtuesit dyshohet se nuk ka respektuar sinjalistikën rrugore, duke shkaktuar zinxhirin e përplasjes mes tre automjeteve. Fatmirësisht, aksidenti ka prodhuar vetëm dëme materiale dhe asnjë person nuk ka mbetur i lënduar.
Unaza Veriore njihet si një segment problematik, ku aksidentet ndodhin shpesh, kryesisht për shkak të degëzimeve të shumta dhe lëvizjes së dendur, që kërkojnë vëmendje të shtuar nga drejtuesit e mjeteve.
