Në kuadër të 8 Dhjetorit, Ditës Kombëtare të Rinisë, kryetari i Bashkisë Pogradec zhvilloi një takim me Këshillin Vendor Rinor të qytetit, ku u diskutuan çështje me rëndësi që prekin drejtpërdrejt jetën dhe të ardhmen e të rinjve pogradecarë.
Gjatë bisedës, të rinjtë dhe përfaqësuesit e bashkisë u fokusuan në prioritetet për përmirësimin e infrastrukturës dhe shërbimeve rinore, si dhe në hartimin e një kalendari të qartë aktivitetesh dhe iniciativash për vitin 2026. Një vëmendje të veçantë mori nevoja për një buxhet më të detajuar dhe specifik për sektorin e rinisë, në mënyrë që projektet me karakter rinor të marrin mbështetjen e duhur financiare.
Kryetari i Bashkisë e cilësoi takimin si një hap të rëndësishëm drejt rritjes së rolit të të rinjve në vendimmarrje dhe forcimit të përfshirjes së tyre aktive në zhvillimin e komunitetit. Ai theksoi se të rinjtë janë energjia, vizioni dhe forca krijuese e Pogradecit, duke garantuar se Bashkia do të vazhdojë t’i mbështesë në çdo nismë që sjell ndryshim pozitiv për qytetin.
