Policia Rrugore e Korçës ka vendosur 820 masa administrative dhe ka arrestuar 4 drejtues mjetesh gjatë periudhës 29.07.2026-05.08.2026, në kuadër të një monitorimi intensiv me dron, radar dhe makina inteligjente në të gjitha akset e qarkut. Ky plan masash vjen për të parandaluar ngjarjet rrugore me pasoja dhe për të menaxhuar trafikun e rënduar për shkak të fluksit të shtuar të automjeteve gjatë sezonit veror.
Shefi i Seksionit të Policisë Rrugore të DVP Korçë, Komisar Qemal Hoxha, theksoi gjatë një deklarate se fokusi i punës së forcave të rendit mbetet evidentimi dhe ndëshkimi i shkelësve. Sipas tij, vëmendje e veçantë po u kushtohet drejtuesve që qarkullojnë nën efektin e alkoolit, atyre pa leje drejtimi, si dhe rasteve të parakalimeve të gabuara apo tejkalimit të limitit të shpejtësisë, të cilat përbëjnë edhe shkaqet kryesore të aksidenteve rrugore.
Bilanci i masave dhe procedimeve penale
Si rezultat i këtij monitorimi javor, policia bën me dije se janë arrestuar 4 drejtues mjetesh dhe janë proceduar penalisht 2 të tjerë. Këta shtetas dyshohen për veprat penale “Drejtimi i mjeteve në mënyrë të parregullt” dhe “Shkelja e rregullave të qarkullimit rrugor”. Ndërkohë, nga 820 masat administrative të vendosura në total, numrin më të lartë e mbajnë shkeljet për parakalime të gabuara me 233 masa, pasuar nga 198 masa për ndalim të gabuar të mjetit.
Gjithashtu, efektivët e rrugores kanë ndëshkuar 49 drejtues për mosrespektim të këmbësorëve në vijat e bardha, 32 për mosvendosjen e kaskës mbrojtëse dhe 31 për mosvendosjen e rripit të sigurimit. Sipas të dhënave zyrtare, janë vendosur edhe 9 masa për drejtim mjeti nën efektin e alkoolit, 2 për përdorim të celularit, si dhe 266 masa për shkelje të tjera të Kodit Rrugor.
Apeli për sigurinë rrugore në qarkun e Korçës
Autoritetet policore bëjnë të ditur se kontrollet do të vijojnë pa ndërprerje në të gjitha akset rrugore urbane, interurbane dhe rurale, duke u mbështetur në përdorimin e mjeteve bashkëkohore logjistike për të përmbushur parametrat e sigurisë. Policia Rrugore e Korçës u bën apel të gjithë drejtuesve të mjeteve që të zbatojnë me rigorozitet rregullat e qarkullimit, duke ftuar njëkohësisht qytetarët që të denoncojnë çdo shkelje në numrin pa pagesë 112.
