Pika e Kalimit Kufitar në Qafë Thanë po bëhet gati për të kaluar në sistemin “One Stop”, një model që do të mundësojë kontrollin e përbashkët kufitar mes Shqipërisë dhe Maqedonisë së Veriut në një ndalesë të vetme.
Për të parë nga afër ecurinë e punimeve dhe përgatitjet teknike, pika kufitare u inspektua nga zëvendësministri i Brendshëm, Xhemal Qefalia, dhe prefektja e Qarkut të Korçës, Florinda Zegullaj, të shoqëruar nga drejtues të institucioneve përgjegjëse për zbatimin e marrëveshjes.
Lehtësim për qytetarët dhe bizneset
Gjatë vizitës në terren u vlerësuan masat organizative dhe infrastrukturore që do të garantojnë funksionimin e sistemit të ri. Zbatimi i kësaj marrëveshjeje pritet të reduktojë ndjeshëm kohën e pritjes për qytetarët dhe bizneset që përdorin këtë doganë, duke shmangur kontrollet e dyfishta dhe duke e bërë lëvizjen ndërkufitare më të shpejtë dhe më efikase.
Sistemi “One Stop” konsiderohet si një hap thelbësor për modernizimin e shërbimeve dhe forcimin e bashkëpunimit mes dy vendeve fqinje. Përveç lehtësimit të qarkullimit të njerëzve dhe mallrave, ky projekt synon të rrisë standardet e sigurisë dhe bashkërendimin institucional në pikën kufitare të Qafë Thanës.
