Banorja e një pallati në Korçë, Kozeta Shakla, ka treguar momentet e para pas vrasjes me armë zjarri të 20-vjeçarit Johan Zuko, ngjarje e cila ndodhi në shkallët e katit të tretë të godinës ku ajo banon.
Dëshmitarja sqaron se në momentin e krimit ndodhej në banesë me nënën e saj, kur ka dëgjuar një zhurmë të fortë që fillimisht e ka menduar si një aksident në shkallë. “Unë isha brenda në shtëpi. Për një moment dëgjova një zhurmë të madhe, sikur plasi diçka. I thashë mamit se do dal të shikoj çfarë po bëhet. Thashë mos ra ndonjë njeri nga shkallët, që t’i ndihmoja”, shprehet ajo.
Zbulimi i skenës së krimit në katin e tretë
Sapo ka dalë nga dera e apartamentit, Shakla ka dëgjuar thirrjet për ndihmë të një fqinjeje. “Ajo gruaja e katit të tretë, te dera e saj ishte bërë ngjarja, thërriste me të madhe: ‘Aman, të lutem, lajmëroni policinë, ambulancën’,” tregon banorja, e cila më pas është ngjitur me vrap dhe ka parë trupin e viktimës të shtrirë barkas.
Përballja me pamjen e të riut të plagosur rëndë ka qenë tronditëse. “Pashë djalin aty, njeri dy metra, djalë të shtrirë poshtë, të gjakosur. Pastaj i rridhte gjaku nga koka. Ishte tmerr”, rrëfen dëshmitarja, e cila shton se ka qenë ajo që ka komunikuar me urgjencën mjekësore. “Nuk e mblidhnim dot veten fare. Zbrita me vrap se më pyesnin nga ambulanca ku e kishit vendin. Pastaj erdhi policia dhe ikëm me ata”.
Viktima i panjohur për banorët e pallatit
Sipas dëshmisë së Kozeta Shaklës, 20-vjeçari Johan Zuko nuk ishte banor i asaj lagjeje dhe prania e tij aty ishte e panjohur për fqinjët. “Nuk e njohim fare. Nuk është i pallatit tonë. Nuk e di as ku banon. Thjesht e pashë aty”, thekson ajo.
Ngjarja e rëndë ka lënë pasoja psikologjike te komuniteti i banorëve, pasi hapësira ku ndodhi krimi është një ambient i përbashkët familjar. “Ne këtu na luajnë fëmijët përditë. Është një tronditje e madhe. Është tmerr i Zotit”, shprehet Shakla, duke përfunduar me detajin që i ka mbetur në kujtesë: “Nuk e harroj dot. Nuk e preka me dorë, nuk e preka me dorë”.
