Gjykata e Korçës ka vendosur masën e sigurisë arrest me burg për Kristjan Sterjon, i cili dyshohet për vrasjen e 20-vjeçarit Johan Zuko. I dyshuari, i cili ka qenë shok fëmijërie me viktimën, u paraqit paraditen e së mërkurës nën masa të rrepta sigurie për t’u njohur me vendimin e trupit gjykues.
Gjatë seancës dëgjimore, i dyshuari është shfaqur i qetë përpara togave të zeza. Në përfundim të procesit, ai ka shprehur pendesë për ngjarjen e rëndë, duke deklaruar shprehimisht: “Jam penduar për atë që kam bërë”.
Zanafilla e konfliktit mes të rinjve
Nga hetimet paraprake dhe dëshmia e dhënë nga vetë i dyshuari, rezulton se përplasja mes dy të rinjve nuk ishte e çastit. Konflikti kishte nisur disa ditë përpara ngjarjes dhe ishte përshkallëzuar pas disa episodeve të mëparshme. Sipas të dhënave të deritanishme, një prej shkaqeve që po verifikohet nga hetuesit lidhet me pretendimin se 20-vjeçari kishte ngacmuar të dashurën e Sterjos.
Përveç këtij pretendimi, grupi hetimor po shqyrton edhe debate, sharje dhe provokime të vazhdueshme mes tyre, ku dyshohet se ka ndikuar edhe përpjekja për dominim në lagje. Sipas dëshmisë së tij për ditën e ngjarjes, Sterjo ka marrë armën, ka ndjekur Zukon dhe e ka qëlluar me një plumb pas shpine, plagë e cila rezultoi fatale për 20-vjeçarin. Hetimet nga ana e autoriteteve vijojnë për zbardhjen e plotë të rrethanave dhe motiveve të këtij krimi.
