Shoqata Kombëtare e Transportit Qytetas dhe ajo e Transportit Urban dhe Interurban kanë paralajmëruar reduktimin e flotës së autobusëve në qarkullim, për shkak të mosmarrjes së kompensimit të naftës nga qeveria. Përmes një shkrese zyrtare drejtuar ministrive të linjës dhe pushtetit vendor, operatorët kërkojnë disbursimin urgjent të fondeve për muajt mars, prill dhe maj 2026.
Vendimi i Këshillit të Ministrave parashikon një kompensim prej 50 lekë për litër karburant për transportin publik. Sipas përfaqësuesve të transportit, të gjitha detyrimet për dokumentimin e aktivitetit dhe sasive të konsumuara janë plotësuar, por masa financiare ende nuk ka kaluar në llogaritë e tyre.
“Kjo situatë po krijon vështirësi të konsiderueshme në administrimin financiar të operatorëve, të cilët, në pritje të zbatimit të vendimit dhe disbursimit të kompensimit, kanë vijuar të përballojnë me burimet e tyre financiare kostot e aktivitetit, duke garantuar vazhdimësinë e shërbimit të transportit publik për qytetarët”, theksohet në letrën e shoqatave.
Kërkesa për zgjatjen e skemës dhe paralajmërimi
Përveç vonesave në pagesa, operatorët ngrenë shqetësimin se çmimi i karburantit vazhdon të mbetet në nivele të larta edhe pas periudhës së mbuluar nga VKM-ja. Për këtë arsye, ata kërkojnë që skema e mbështetjes financiare të vijojë edhe pas muajit maj 2026, si dhe të kenë informacion zyrtar mbi arsyet e vonesës së deritanishme.
Në mungesë të një reagimi nga institucionet, shoqatat paralajmërojnë pasoja të drejtpërdrejta për qytetarët. “Në rast se nuk do të ketë një reagim konkret dhe në kohë nga institucionet përgjegjëse për zgjidhjen e situatës, operatorët e përfaqësuar nga të dyja shoqatat do të detyrohen të rishikojnë kapacitetet operative dhe numrin e mjeteve të transportit publik që mund të nxjerrin në qarkullim, në përputhje me mundësitë reale financiare dhe operative të secilit operator”, thuhet në kërkesën e tyre.
Ata theksojnë se kjo nuk është një zgjedhje e dëshiruar, pasi do të ndikonte drejtpërdrejt në frekuencën e shërbimit, por mbetet një domosdoshmëri përballë kostove të larta që cenojnë qëndrueshmërinë ekonomike të aktivitetit të tyre.
