Rreth 300 pacientë të qarkut juglindor do të mund të marrin trajtimet onkologjike pranë vendbanimit të tyre, pas rikonstruksionit dhe pajisjes me standarde bashkëkohore të njësisë së kimioterapisë ditore në Spitalin Rajonal të Korçës.
Ky investim synon decentralizimin e shërbimeve onkologjike, duke shmangur udhëtimet e lodhshme drejt Tiranës për qytetarët që përballen me sëmundje malinje. Ministrja e Shëndetësisë, Evis Sala, theksoi se qëllimi kryesor i kësaj ndërhyrjeje është ofrimi i shërbimit aty ku ndodhet pacienti, duke lehtësuar barrën fizike dhe financiare të familjeve.
“Nuk mund të flasim për një sistem shëndetësor cilësor nëse një pacient me kancer duhet të udhëtojë qindra kilometra për të marrë trajtimin që i nevojitet. Objektivi ynë është që shërbimi të shkojë pranë pacientit dhe jo pacienti të udhëtojë për shërbimin. Korça është një hap konkret në këtë drejtim: standarde më të mira, kushte më të sigurta dhe kujdes më pranë qytetarëve”, deklaroi ministrja Sala.
Rrjeti Kombëtar i Onkologjisë
Ndërhyrja në Spitalin Rajonal të Korçës nuk është e izoluar. Ajo është pjesë e një projekti më të gjerë që parashikon modernizimin e 8 pikave të tjera rajonale të kimioterapisë në të gjithë vendin, në kuadër të krijimit të një Rrjeti Kombëtar të Onkologjisë. Kjo nismë pritet të lehtësojë ndjeshëm fluksin në spitalet qendrore dhe të rrisë cilësinë e jetës për pacientët në rrethe.
