Lidhja Demokratike e Kosovës ka hequr dorë nga të gjitha kërkesat për poste drejtuese dhe bashkëqeverisje me Lëvizjen Vetëvendosje, duke zgjedhur të qëndrojë në opozitë. Vendimi u bë i ditur nga kryetari i LDK-së, Lumir Abdixhiku, pas një mbledhjeje tri-orëshe të Grupit Parlamentar, i cili theksoi se pavarësisht tërheqjes, partia është e gatshme të votojë një kandidat konsensual për President të Kosovës për të shmangur bllokadën institucionale.
Gjatë deklaratës së tij, Abdixhiku sqaroi se LDK ka refuzuar ofertat e bëra nga kreu i Vetëvendosjes, Albin Kurti. Ai mësohet të ketë deklaruar se “Le t’i mbajë të gjitha Vetëvendosje”, duke i lënë kësaj force politike përgjegjësinë e plotë për zgjidhjen e ngërçit. “Kemi hequr dorë nga të gjitha postet, qoftë kryetarin e Kuvendit, qoftë tri ministritë e ofertuara në takim me Kurtin, qoftë edhe postin e Presidentit. Ne mbështesim krijimin e institucioneve dhe zgjedhjen e një presidenti konsensual për ta zhbllokuar krizën”, ka thënë zyrtarisht kreu i LDK-së.
Qëndrimi në opozitë dhe vota për Presidentin
Duke theksuar se LDK-ja do ta ushtrojë përgjegjësinë e saj si opozitë me dinjitet, Abdixhiku bëri të qartë se partia nuk do të shërbejë si fasadë për mazhorancën e re. “Meqë LVV-ja po vlerëson se s’ka nevojë për partner, s’do ta ketë as si dekor. Do të qëndrojmë në opozitë dhe do ta ushtrojmë këtë përgjegjësi me dinjitet. Pavarësisht këtij qëndrimi, s’do ta shndërrojmë zhgënjimin politik në bllokadë. Jemi të gatshëm të bisedojmë për zgjedhjen e një presidenti që mbron interesat e Republikës”, përfundoi Abdixhiku.
