Katër punonjës të Policisë së Shtetit pranë Pikës së Kalimit Kufitar të Kapshticës dhe një shtetas nga fshati Vërdovë i Pogradecit janë arrestuar në flagrancë nga Agjencia e Mbikëqyrjes Policore (Rajoni Elbasan – Korçë), në bashkëpunim me Prokurorinë e Korçës. Të arrestuarit dyshohen për kryerjen e veprës penale “Shpërdorim i detyrës” dhe për përfshirje në trafikun e lëndëve narkotike.
Efektivët e ndaluar në Kapshticë
Sipas njoftimit të autoriteteve, efektivët e arrestuar janë N/Komisar Y. D., me detyrë Përgjegjës Turni në PKK Kapshticë; Inspektor F. B., Specialist/Kontrollor; Inspektor L. H., Trupë Shërbimi; si dhe Inspektor D. M., Trupë Shërbimi/Kontrollor në dalje, ndaj të cilit rëndon edhe dyshimi për “Prodhimi dhe mbajtja e armëve shpërthyese dhe municioneve”. Po ashtu, është arrestuar edhe shtetasi V. B., banues në Vërdovë të Pogradecit.
Sekuestrohen mbi 6 kg heroinë dhe municione
Nga hetimet ka rezultuar se punonjësit e policisë, në shkelje të ligjit, nuk kanë ushtruar kontroll ndaj mjetit me drejtues shtetasin V. B., ku gjendej e fshehur lënda narkotike. Në cilësinë e provës materiale janë sekuestruar 6 kg e 134 gr lëndë e dyshuar narkotike “Heroinë”, 5 aparate celularë, 256 fishekë pistolete model TT, 20 fishekë armë gjahu model 12, si dhe një automjet. Materialet u referuan në Prokurorinë pranë Gjykatës së Shkallës së Parë të Juridiksionit të Përgjithshëm Korçë.
